بھارت نے انگلینڈ کو پانچویں اور آخری ٹیسٹ میں دلچسپ مقابلےکے بعد 6 رنز سے ہرا دیا، انگلش فاسٹ بولر کرس ووکس ٹیم کو فتح تو نہ دلواسکے تاہم فریکچرڈ ہاتھ سے بیٹنگ کے لیے آنے پر تماشائیوں سے بھرپور داد سمیٹی۔
لندن اوول میں ٹیسٹ کے آخری دن انگلینڈ کو 374 رنز کا ہدف حاصل کرنے کےلیے صرف 35 رنز درکار تھے اور اس کی 4 وکٹیں باقی تھی ۔ ابتدا میں جیمی اوورٹن نے دو چوکے لگاکر انگلینڈ کو دن کا اچھا آغاز فراہم کیا لیکن دوسرے ہی اوور میں جیمی اسمتھ، محمد سراج کا شکار ہوگئے۔
پھر سراج نے اوورٹن کو بھی پویلین بھیج دیا، جوش ٹنگ بغیر کوئی رن بنائے چلتے بنے ۔ آخر میں میچ کے دوران انجرڈ ہونے والے کرس ووکس زخمی ہاتھ کے ساتھ بیٹنگ کےلیے آئے، دوسرے اینڈ سے گس ایٹکنسن نے مزاحمت جاری رکھی لیکن وہ ہدف سے 6 رنز دوری پر ہمت ہارگئے۔
انگلینڈ کی ٹیم 367 رنز بناکر آؤٹ ہوگئی اور یوں پہلی مرتبہ ہونے والے اینڈرسن ، ٹنڈولکر ٹرافی سیریز دو ۔ دو سے برابر ی پر ختم ہوئی۔
کرس ووکس ٹیم کو فتح تو نہ دلواسکے تاہم ہمت اور بہادری دکھانے پر تماشائیوں نے ان کی خوب حوصلہ افزائی کی۔
