سری لنکن ویمن کرکٹ ٹیم جنوبی افریقا کے خلاف ون ڈے انٹرنیشنل میں نئی تاریخ رقم کرتے ہوئے تین سو سے زائد کا ہدف عبور کرنے والی پہلی ٹیم بن گئی ہے۔
رپورٹ ! محمد نوید
 |
جنوبی افریقن ویمن ٹیم کے خلاف تیسرے ون ڈے میں سری لنکا نے 302 کا ہدف 33 گیند قبل حاصل کرلیا، جنوبی افریقا کے 301 کے جواب میں سری لنکا ویمن نے چار وکٹ پر 305 رنز اسکور کیے ۔
سری لنکن ٹیم کی جانب سے بنایا گیا اسکور ویمن ون ڈے انٹرنیشنل کرکٹ میں سب سے بڑا کامیاب رن چیز ہے۔
میچ کے دوران سری لنکن کپتان چمری اتاپتو نے 139 گیندوں پر 26 چوکوں اور 5 چھکوں کی مدد سے ناقابل شکست 195 رنز بنائے۔
چمری اتاپتو کا اسکور ویمن ون ڈے میں دوسری اننگز کا سب سے بڑا اسکور اور مجموعی طور پر ویمن ون ڈے کرکٹ کا تیسرا سب سے بڑا انفرادی اسکور ہے۔
