ویسٹرن پراونس کرکٹ ایسوسی ایشن (WPCA) کے زیراہتمام چھ اوورز پر مشتمل منفرد کرکٹ ٹورنامنٹ “6 اوورز کرکٹ ہنگامہ” 23 ستمبر 2025 کو سعودی عرب کے یوم الوطنی کے دن جدہ میں منعقد ہوگا۔
چیف آرگنائزر ندیم الندوی نے میڈیا اور سوشل میڈیا کو بریفنگ دیتے ہوئے بتایا کہ اس ایونٹ میں 12 ٹیمیں شرکت کریں گی جن میں سے دو ٹیمیں دمام، ایک طائف، ایک ینبع، دو تبوک جبکہ 6 ٹیمیں جدہ سے میدان میں اتریں گی۔
ٹورنامنٹ کی خاص بات یہ ہے کہ اس میں سات انٹرنیشنل کرکٹرز بھی شامل ہوں گے۔
ان کا کہنا تھاکہ سابق اسٹار آل راؤنڈر عبدالرزاق اور فاسٹ بولر عمر گل مہمان خصوصی ہوں گے،جب کہ صہیب مقصود، سہیل خان، سہیل تنویر،عثمان خان، عماد بٹ پہلی بار براہ راست ٹیموں کا حصہ بن کر کھیلیں گے۔
ندیم الندوی کے مطابق یہ جدہ کے لیے ایک بڑا اعزاز ہے کہ اتنی بڑی تعداد میں انٹرنیشنل کھلاڑی ایک ساتھ کسی مقامی ایونٹ میں حصہ لے رہے ہیں۔
انہوں نے مزید بتایا کہ ایونٹ کو “کرکٹ ہنگامہ” اس لیے نام دیا گیا ہے کیونکہ اس میں کھیل کے قوانین کو منفرد انداز میں ترتیب دیا گیا ہے جیسے کہ چھکا مارنے پر 10 رنز، چوکے پر 6 رنز، جبکہ وائٹ اور نو بال پر 2 رنز دیے جائیں گے تاکہ میچز مزید دلچسپ اور ہائی اسکورنگ ہوں۔
میڈیا بریفنگ کے دوران ڈبلیو پی سی اے کے جنرل سیکرٹری سہیل احمد، ایگزیکٹو ممبر کاشف مرزا اور انٹرنیشنل امپائر و ٹورنامنٹ کمیٹی کےہیڈ آف ٹیکنیکل ایڈوائزر اسامہ سعد بھی موجود تھے۔
چیف آرگنائزر نے یہ بھی یقین دہانی کرائی کہ ٹورنامنٹ کے دوران شفافیت کو یقینی بنانے کے لیے خصوصی اقدامات کیے گئے ہیں، تمام میچوں میں پروفیشنل امپائرز خدمات انجام دیں گے تاکہ کھیل کے معیار اور ایمانداری پر کوئی سوال نہ اٹھ سکے۔
ان کا کہنا تھاکہ تماشائیوں کے لیے بھی خصوصی قرعہ اندازی رکھی گئی ہے جس کے ذریعے شائقین کرکٹ کو قیمتی انعامات جیتنے کا موقع ملے گا، ایونٹ کی فاتح ٹیم کو 30 ہزار سعودی ریال کا انعام دیا جائے گا۔
