لیجنڈز لیگ میں آسٹریلوی چیمپئنز کے فاسٹ بولر جان ہیسٹنگز نے پاکستان چیمپئنز کے خلاف میچ میں 18 گیندوں کا ایک اوور کرنے کے بعد اینٹی کرپشن یونٹ کے آفیشلز کا ان سے رابطہ کرنے کا انکشاف کیا ہے۔
گزشتہ ماہ جان ہیسٹنگز نے لیجنڈز لیگ میں پاکستان چیمپئنز کے خلاف ایک اوور 18 گیندوں کا کروایا تھا۔ انہوں نے اوور میں 2 مرتبہ مسلسل 5،5 وائیڈ گیندیں کرائی تھیں۔
سابق آسٹریلوی فاسٹ بولر نے اوور میں مجموعی طور پر 20رنز دیے تھے۔
جان ہیسٹنگز نے اب ایک انٹرویو میں انکشاف کیا کہ 18 گیندوں کا اوور کرنے کے بعد اینٹی کرپشن یونٹ کے آفیشلز نے مجھ سے رابطہ کیا تھا۔
Mind-boggling 18-ball over by Australian John Hastings, with 12 wides and a no-ball! 🥴pic.twitter.com/CEDGQ0LTOs
— Satish Acharya (@satishacharya) July 30, 2025
جان ہیسٹنگز نے بتایا کہ اینٹی کرپشن یونٹ کے کچھ لوگ میرے پاس آئے اور کہاکہ گزشتہ روز آپ نے ہمیں بڑی مثکل میں ڈالا، ہمیں اس معاملے کو دیکھنا ہے۔
جان ہیسٹنگز نے بتایا کہ میں نے اینٹی کرپشن یونٹ کے آفیشلز سے کہا کہ کیا آپ کا خیال ہے کہ میں نے میچ فکسنگ یا ایسی کوئی چیز کی ہے جس پر انہوں نے کہا کہ نہیں لیکن ہم نہیں جانتے کہ آپ 7 برس کہاں رہے اور کیا کرتے رہے ، میں نے کہا کہ میں کرپٹ نہیں پاکستان کے خلاف میچ کی وضاحت کرنا مشکل ہے۔
جان ہیسٹنگز نے کہا کہ مجھے کرکٹ سے متعلقہ لوگوں کے بے شمار پیغامات آئے، سوشل میڈیا پر مجھے ڈیڑھ ملین لوگوں نے پیغامات بھیجے ، میں نے 3 روز اپنا سوشل میڈیا اکاؤنٹ بند رکھا، مجھے کچھ سمجھ نہیں آرہا تھا کہ میں کیا کروں ، یہ سب میرے لیے شرمناک تھا، یہ تکلیف دینے والی چیز بھی تھی۔
انہوں نے بتایا کہ میں نے پاکستان کے خلاف میچ کے بعد آفیشل ریٹائرمنٹ پارٹی بھی دی تھی۔
واضح رہے کہ جان ہیسٹنگز ریٹائر ڈ پلیئر ز کی لیگز کے ساتھ 2022 سے منسلک ہیں۔پاکستان چیمپئنز نے آسٹریلیا چیمپئنز کے خلاف میچ میں 10 وکٹوں سے کامیابی حاصل کی تھی۔
