بنگلا دیش کرکٹ بورڈ کے چیئرمین کرکٹ آپریشنز ناظم العابدین فہیم نے اپنے ملک کی پچز کو سخت تنقید کا نشانہ بنایا ہے۔
میڈیا رپورٹس کے مطابق پاکستان کے خلاف سیریز کے لیے پچز پر خاصی تنقید سامنے آئی تھی اور بنگلادیش کے بورڈ آفیشل نے شیر بنگلا کرکٹ اسٹیڈیم کی پچ کے باؤنس کو غیر تسلی بخش قرار دیا تھا۔
اب بنگلا دیش کرکٹ بورڈ کے اعلیٰ عہدیدار نے اپنی پچز پر عدم اطمینان کا اظہار ہے۔
چیئرمین کرکٹ آپریشنز بی سی بی ناظم العابدین فہیم نے کہا کہ سپورٹنگ پچز تیار کرنے کی کوشش کی گئی تھی لیکن ایسا نہیں ہو سکا، ذمہ داری ان پر عائد ہوتی ہے جو پچز کی تیاری کے انچارج ہیں۔
ناظم العابدین فہیم نے کہا کہ بورڈ نے کبھی لو باؤنس اور سلو پچز کی تیاری کی ہدایت نہیں کی، زیادہ باؤنسی ٹریک کی جب درخواست کی گئی بہت کم ایسی پچز تیار ہوئیں، ہمیں قدرتی گراؤنڈ کنڈیشنز اور زیادہ میچ کا ہونا وجہ بتایا جاتا ہے۔
انہوں نے کہا کہ میرپور کی وکٹ مجموعی طور پر تسلی بخش نہیں ہے، ہمیں مستقبل میں اس حوالے سے کام کرنا ہوگا، پچز کے معاملے کو مستقبل میں ترجیحی بنیادوں پر دیکھا جائے گا۔
یاد رہے کہ پاکستان اور بنگلادیش کے درمیان حال ہی میں کھیلی گئی ٹی ٹوئنٹی سیریز کے پہلے دو میچز لو اسکورنگ رہے تھے۔
پہلے دو میچز میں پاکستان ٹیم کو شکست ہوئی تو ہیڈ کوچ پاکستان کرکٹ ٹیم مائیک ہیسن نے بھی پچز پر تنقید کی تھی اور انہیں دنیا میں لو اسکورنگ پچ قرار دیا تھا۔
