جنوبی افریقا کے روسی وین ڈر ڈوسن نے پاکستان سپر لیگ (پی ایس ایل) 10 کے بقیہ میچز کیلئے اسلام آباد یونائیٹڈ کو اپنی دستیابی ظاہر کردی۔
وین ڈر ڈوسن اس سے قبل ڈرافٹ میں پک ہونے کے بعد ذاتی وجوہات کی وجہ سے پی ایس ایل سے دستبردار ہوئے تھے۔
تاہم اب روسی وین ڈر ڈوسن نے اسلام آباد یونائیٹڈ کو اپنی دستیابی ظاہر کردی ہے۔اسلام آباد یونائیٹڈ نے بھی ڈوسن کی بقیہ میچز میں شمولیت کا اعلان کر دیا۔
ترجمان اسلام آباد یونائیٹڈ کے مطابق مینجمنٹ رسی وین ڈر ڈوسن کو پی ایس ایل میں خوش آمدید کہتی ہے، ورلڈ کلاس کھلاڑی کے پی ایس ایل میں آنے سے چار چاند لگ جائیں گے۔
اسلام آباد یونائیٹڈ کی ٹیم اس سے قبل ایلکس ہیلز کی پی ایس ایل 10 کے بقیہ میچز میں شمولیت کا بھی اعلان کر چکی ہے۔
واضح رہے کہ گزشتہ دنوں پاکستان اور بھارت کی کشیدگی کی وجہ سے پی ایس ایل کو معطل کیا گیا تھا تاہم جنگ بندی کے بعد اب لیگ کو بحال کرکے میچز 17 سے 25 مئی کو ہوں گے۔
17 مئی کو راولپنڈی اسٹیڈیم میں پشاور زلمی اورکراچی کنگز کے درمیان میچ ہو گا۔
